Jab pyaar nahin hai to bhulaa kyun nahin dete,
Khat kis liye rakhhe hai jalaa kyun nahin dete,
Kis vaaste likha hai hatheli pe mera naam,
Main harf-e-ghalat hoon to mitaa kyun nahin dete,
Lillaah, shab-o-roz ki uljhan se nikaalo,
Tum mere nahin ho to bataa kyun nahin dete,
Reh reh ke na tarrpao ae be-dard maseeha,
Hathon se mujhe zehr pilaa kyun nahin dete,
Jab us ki wafaaon pe yaqeen tum ko nahin hai,
Hasrat ko nigaahon se giraa kyun nahin dete..
No comments:
Post a Comment