Dastoor

Deep jis ka mahalaat hi mein jalay,

Chand logon ki khushiyon ko le kar chalay,
Woh jo saaye mein har maslihat ke palay,
Aisay dastoor ko, subah be-noor ko,
Main nahi manta, main nahi janta.

Main bhi kha’if nahi takhta-e-daar se,
Main bhi Mansoor hoon, keh do aghyaar se,
Kiyun darate ho zindaan ki deewar se,
Zulm ki baat ko, jahal ki raat ko,
Main nahi manta, main nahi janta.

Phool shaakhon pe khilne lage, tum kaho,
Jaam rindon ko milne lage, tum kaho,
Chaak seenon ke silne lage, tum kaho,
Is khulay jhoot ko, zehan ki loot ko,
Main nahi manta, main nahi janta.

Tum ne loota hai sadiyon hamara sukoon,
Ab na hum par chalega tumhara fasoon,
Chara’gar dardmandon ke bante ho kiyun,
Tum nahi chara’gar, koi maane magar,
Main nahi manta, main nahi janta.

...............Habib Jalib