Betiyan

Un ko aansoo bhi jo mil jaen to muskaati hain
Betiyan to badi masoom hain jazbaati hain

Apni khidmat se utar jaati hain dil mein sab ke
Har nayi nasal ko tehzeeb yeh sikhaati hain

In se qaaim hai taqaddus bhi hamare ghar ka
Subah ko apni namazon se yeh mehkati hain

Log beton se hi rakhte hain tawaqqu lekin
Betiyan apni bure waqt mein kaam aati hain

Betiyan hoti hain pur-noor charaghon ki tarah
Roshni karti hain jis ghar mein chali jaati hain

Apne susraal ka har zakham chhupa leti hain
Samne maa ke jab aati hain to muskaati hain

Betiyon ki hai zamane mein anokhi khushboo
Yeh woh kaliyan hain jo sehra ko bhi mehkati hain

Ek beti ho to khil uthta hai ghar ka aangan
Ghar wohi hota hai par ronaqein barh jaati hain

Fatima Zahra ki ta’zeem ko uthte the Rasool
Mohtaram betiyan is waaste kehlaati hain

Apne baba ke kaleje se lipat kar manzar
Zindagi jeene ka ehsas dila jaati hain

................Manzar Bhopali